Атырауда Газ сепарациялау кешені (ГСК) жобасы аясындағы жергілікті қамтуды дамыту форумы өтті. Іс-шараны «KMG PetroChem» ЖШС жобаның EPC-мердігері Tecnimont компаниясымен, Consolidated Contractors Company (CCIC) және PetroCouncil қауымдастығымен бірлесіп ұйымдастырды. Форумға шамамен 400 қатысушы – қазақстандық өндірушілер мен жеткізушілер, мемлекеттік органдар мен салалық бірлестіктердің өкілдері қатысты. Форум 19 қарашада өткен алғашқы қада қағу рәсімінен кейінгі келесі күні өтті. Бұл рәсім жоба құрылысының белсенді кезеңіне өткенін білдірді.
Атырау облысы елдің энергетика және мұнай-химия саласындағы жетекші өңірі ретінде ірі инвестициялық жобаларды қолдап, оларды қажетті инфрақұрылыммен қамтамасыз етіп, тиімді іске асуына мүмкіндік жасап келеді.
«Газды сепарациялау кешенінің құрылысы өңір экономикасын әртараптандыруға, өндірістік қуаттарды арттыруға, заманауи технологияларды енгізуге, сондай-ақ жергілікті қамтуды дамытуға айтарлықтай серпін береді», – деді Атырау облысының әкімі Серік Шәпкенов форум қатысушыларына арнаған алғысөзінде.
Жергілікті қамтуды дамыту – жобаның негізгі басымдықтарының бірі. ГСК құрылысының шарықтау шегінде (2026–27 жж.) Атырау және Маңғыстау облыстарының тұрғындары үшін 3 500-ге дейін уақытша жұмыс орны құрылмақ. EPC-шарт аясында мердігер құрылыс-монтаж жұмыстарына тартылатын еңбек ресурстарының құрамында 90%-ға дейін қазақстандық мамандардың болуын қамтамасыз етуге міндеттеледі. Сондай-ақ барлық қосалқы мердігерлер қазақстандық компаниялар болады.
«KMG PetroChem» ЖШС Бас директоры Диаз Диянов отандық компаниялардың қатысуын кеңейту жобаның стратегиялық басымдығы екенін атап өтті:
«Біздің міндет – жобаны сапалы әрі уақытылы орындау ғана емес, сонымен қатар қазақстандық компанияларды кеңінен тарту. Отандық өндірушілер мен мердігерлердің әлеуеті жоғары екенін көріп отырмыз және оларды жобаға қатыстыру үшін қажетті қолдау көрсетуге дайынбыз. Форум ерте кезеңнен бастап тікелей диалог орнатып, тиімді ынтымақтастыққа жағдай жасауға мүмкіндік береді».
Алдағы құрылыс көлемін ескере отырып, мердігерлер жергілікті серіктестер пулын қалыптастыруды бастады. Бұл CCIC компаниясы мен қазақстандық кәсіпорындар арасында ынтымақтастық туралы бірқатар меморандумдарға қол қоюды қамтыды. Құжаттар қада мен инертті материалдарды өндіру және жеткізу, уақытша құрылыс жұмыстары, металл конструкцияларын дайындау, сондай-ақ жобалау және техникалық қадағалау қызметтерін көрсетуді реттейді. Бұл бағыттар ГСК құрылысының жақын кезеңдегі негізгі жұмысы болмақ.
Бағдарламаның келесі маңызды бөлігі – TecnimontKZ вице-президенті Никколо Хейлперн ұсынған «Қазақстандағы жергілікті қамтуды дамыту стратегиясы» атты презентация болды. Баяндамасында EPC-мердігердің жергілікті нарықпен өзара іс-қимылдың жүйелі тәсілдері және ГСК жобасын іске асырудағы қазақстандық компаниялардың рөлі айқындалды.
TECNIMONT KZ вице-президенті Хейлперн Никколо жергілікті қамтудың маңыздылығын атап өтті:
«Local Value Shared Growth форумының бұл сессиясы жергілікті қамтуды дамыту бағдарламаларының (ICV) әріптестер үшін де, жалпы саланың өзі үшін де маңызын тағы бір мәрте көрсетеді. PetroCouncil қауымдастығымен ынтымақтастық, оның құрамына жақында Tecnimont KZ қосылды, жергілікті нарықпен ықпалдастықтың және экономикалық дамуға үлес қосудың артықшылықтарын айқын көрсетеді».
Қазақстандық компанияларды ірі өндірістік жобаларға жүйелі түрде тарту тақырыбы PetroCouncil төрағасы Асылбек Джакиевтің сөзінде жалғасын тапты:
«Біздің мақсат – әрбір компания, мейлі ірі өндіруші болсын, мейлі ШОБ субъектісі болсын, ірі индустриялық жобаларға қатысу мүмкіндігіне ие болуы. Сондықтан бүгінгі алаң өте маңызды. Жоба бойынша сатып алулар, техникалық талаптар және локализация әлеуеті туралы мәліметтерді алдын ала ашық түрде ұсынуға дайындық танытқаны үшін KMG PetroChem, Tecnimont және CCIC компанияларына алғыс айтамыз. Бұл – инвесторлар, EPC-мердігерлер және қазақстандық нарық арасындағы өзара қатынастар қандай болуы тиіс екенін көрсететін үлгі».
ГСК жобасы «Тенгизшевройл» ЖШС-пен тығыз өзара іс-қимылда жүзеге асырылады, сондай-ақ Атырау облысы әкімдігі мен салалық бірлестіктер – KazService, «Атамекен», KazEnergy, IMBC және PetroCouncil тарапынан қолдау көрсетіледі. Мұндай әріптестік форматы ел ішіндегі тұрақты жеткізілім тізбегін қалыптастырып, қазақстандық компаниялардың ұлттық деңгейдегі ірі индустриялық жобаларға қатысу мүмкіндіктерін кеңейтеді.
Анықтамалық ақпарат:
Газ сепарациялау кешенін (ГСК) салу жобасы полиэтилен өндіретін «Силлено» зауытын қажетті шикізатпен қамтамасыз етуге бағытталған. Кешен жылына 9,1 млрд м³ дейін «Теңізшевройл» ЖШС жеткізетін құрғақ газды өңдеп, жылына 1,6 млн тоннаға дейін этан және 360 мың тоннаға дейін пропан өндіреді.
Жоба «KMG PetroChem» ЖШС (Қазақстан Республикасы «ҚазМұнайГаз» ҰК» АҚ еншілес компаниясы) тарапынан жүзеге асырылуда. Құрылыс Италияның Maire тобына кіретін Tecnimont S.p.A жетекшілік ететін халықаралық консорциуммен, оның құрамындағы CCIC (Ливан) компаниясымен бірлесіп атқарылуда.